BRUSSEL, ALGEMEEN RIJKSARCHIEF Arenberg Burggravie Gent LA 7971, akte d.d. 13 december 1498

13 december 1498

Denombrement door Daneel Goetghebuer als voogd en echtgenoot van leenhoudster Josine van Leyns, van het leengoed Nieuwburg in Ertvelde en Zelzate, ressorterend onder het leenhof van de Burggravie in Heusden.

Ic Daneel Goetghebuer doen te wetene allen den ghonen die dese presente / letteren zullen zien of hooren lesen, dat ic als man van voochdien ter causen van Jozijne / van Leyns minen wive als ervachteghe, houdende bem van hooghen ende moghende heere / mer Huughe van Mulun, ruddere, heere van Cannont ende van Huesdene ende van zijnen hove (), / een leen gheleghen in diversschen sticken ende parcheelen binnen Assenede ambocht in de / prochie van Artvelde in de Trist ter plaetsche gheheeten Nieuburch, te wetene XV / ghemeten IJc ende neghen roeden. Item noch V hondert XLIJ roeden metten grachten. / Item dwers () over de strate de hofstede groot IJ ghemete C XXXVIJ roeden. Item / bachten der ofstede XJc ende IJ roeden ende te Selsate an de strate IIIJ ghemeten / IJ hondert LXXIJ roeden. Dit voorseide leen staet alst verandert te V lb. par. / van alfven relieve ende X s. par. van alfven camerlijncghelde. Ende voort / ter trauwen ende () waerheden minen voornomden heere. Ende aldus zo gheve ic / Daneel Goetghebuer voorseit als man van voochdien ter causen van minen voornomden / wive als ervachteghe, welc voornomden leen ic overgheve in voorme van / denombremente ende grootten van leene ter goeder trauwen zonder scamp ende / int verbeteren van den mannen mijns voorschreven heeren van zijnen hove te Huesdene vornomt / wijens huusghenoet ic bem ter causen als voren. In kennessen mins zeghels hier/an hanghende. Ghegheven den XIIJe decembre anno XCVIIJ.

BRUSSEL, ALGEMEEN RIJKSARCHIEF, Arenberg Burggravie Gent Laloire 7971, akte d.d. 15 januari 1463

15 januari 1463 (N.S.)

Denombrement door Jan Corthals van een leen van 1 bunder land in Ertvelde, gehouden van het leenhof van de burggravie van Gent in Heusden.

Dit naervolghende es de grootte ende overgheven van eenen leene dat ic, Jan Corthals, houdende / ben in leene ende manschepe van edelen ende moghenden heere, mijnen heere van Antoingen, van / zijnen hove tHuesdene ende dat daer toebehoort. Welc leen es een bundre groot, ligghende / tusschen der Vene ende Oosteecloe, in tween sticken, deen neffens dandre. Ende ghelandt / an de oostzijde mijn joncfrauwe Plaschs, ende ooc an de noortzijde de zelve joncfrauwe, an de westzijde / de weduwe Rogiers van den Velde, ende an tzuuthende de ghemeene heyde van der / Vene. tZelve leen staende te trauwen ende waerheden, ten dienste ende relieve / van der bester vrome van drien. Aldus ghevic, Jan Curthals voornomt, tzelve mijn / leen over onder mijnen zeghel, ten af ende toedoene van den mannen van den voorseiden / hove dies huusghenoot dat ic bem, den XVsten dach van laumaent / int jaer ons Heeren duust vierhondert twee ende zestich.

BRUSSEL, ALGEMEEN RIJKSARCHIEF, Arenberg Burggravie Gent Laloire 7971, akte d.d. 9 december 1490

9 december 1490

Denombrement door Michiel Sanders van een leen van 1 gemet land in Ertvelde aan de Hul, gehouden van het leenhof van de burggravie van Gent in Heusden.

Dit naervolghende es de grootte van eenen leene dat ic, Michiel Sanders / houdende bem in leene ende manscepe van hoghen ende moghenden heere, / mer Janne van Mulluun, ruddre, borchgrave van Ghend, van zijnen hoove te / Huesdene met dat daer toebehoort. tZelve leen gheleghen in de prochie / van Aertevelde, daer ment heet an den Hul, groot zijnde een ghemet, / lettel min ofte meer. Oost ghelant sHeerenstrate, ende noort dhorie / van Pieter Johannes. Welc voorseyde leen staet te trauwen ende / waerheden zijnen heere, ende teenen vullen reliefve van tien ponden / pariisis ende twintich scellinghe pariisyse van camerlincghelde ofte / de beste vrome van drie jaeren deene, alst tzelve min leen versterft. / Ende alst tvoornomde leen verwandelt bij cope, zo es men daeraf sculdich / den tiensten penninc van dat loyalic ghelt in cope, relief ende camzer/lincghelt als voors. es. Welc leen ic, Michiel Sanders voornomt aldus / overgheve in vormen van denombremente eersamen wijsen ende / voersieneghen Alaert Goetghebuer als bailliu ende wettelic / maendre van mijnen heere, den borchgrave voornomt, altijts inne / tverbeteren van den mannen van den zelven hove. In kennessen mijns / zeghels hieronder ghedaen hanghen den neghensten dach / van decembre int jaer XIIIJc ende neghentich.

BRUSSEL, ALGEMEEN RIJKSARCHIEF, Arenberg Burggravie Gent Laloire 7971, akte d.d. 20 mei 1460

20 mei 1460

Denombrement door Kristoffel Metteneye en Jacop Breyndele, voogden van Joos van Steelandt zoon van Hellin, en dit van 5 lenen die Joos houdt van het leenhof van de Burggravie van Gent in Heusden. Het betreft 1)het goed Te Waelpreyt in Ertvelde, 2)een erfelijke rente van 2 ponden groten per jaar gevestigd op Te Waelpreyt, 3)een erfelijke penningrente van 20 ponden parisis per jaar op cijnsgronden van een ander leen in Ertvelde, Kluizen en Doornzele-Ter Donk (Evergem), dat eveneens gehouden wordt van de Burggravie, 4)de helft van een tiende in Ertvelde, waarvan de "parochie" de andere helft opstrijkt, 5)33 bunder land in Ertvelde, genaamd tGoedekin.

Wij, Christoffels Metteneye ende Jacob Breyndele, wetteleke vooghden van Jooskine, tkindt Hellins van Steelandt, doen te wetene allen lieden, / dat tselve Jooskin houdende es te leene ende in manscepen van edelen ende waerden joncheere Jan van Meluun, buerchgrave van Ghendt, / van zinen heerscepe ende hove van Huesdene, vijf leengoeden, ligghende binnen der prochie van Aertevelde ende daer omtrent. Daerof dat / teen ers tgoedt ende thof, gheheeten Te Waelpreyt, met allen den huusen ende boomen daerup staende, zuudwest van der voors. kerke, groot / zijnde tusschen den XXVIIJ ende dartich bundre lande, lettel meer of min, met alle zinen ghevolghe ende toebehoorten. Item tander leen / es eene erveleke rente van twee ponden groten tsiaers, ghespleten van den voors. leene, ende up tselve verzekert. Item tarde leen / es eene pennijncrente van twintich ponden parisis erveleker renten siaers, ligghende ende streckende up zekere erfachtichede te Aertevelde, / Ter Cluusen ende te Dorijcseele Ter Oosterdonc, up de heerlichede die men houdende es van den voors. heere den buerchgrave van Ghendt. / Item tvierde leen es eene thiende, ligghende in de voors. prochie van Aertevelde, daerof twederdeel heift de prochie, die wilen / was meester Lauwereins Stevins gheheeten Merlebeke, ende strect ende gaet rondt ommegaens den doorpe van Aertevelde, huuteghedaen / an den mersch, ende ter zuudside van den dorpe. Ende tvijfste leen es gheheeten tGoedekin, ligghende in de voors. prochie van Aerte/velde bi den cloostre van Oosteeclo, groot drie ende dartich bundre onder winnende landt ende velt, lettel meer oft min. Staende / dese voors. vive leengoeden ende elc zonderlinghe, te dienste van trauwen ende van waerheden, ten relieve van tiene ponden / parisis ende XX groten van camerlincghelde telker veranderinghe. Ende alsij veranderen bi coope, zo moet men daerof gheven / mijnen voors. heere den buerchgrave den thiendepennijnc van dat zij vercocht worden. Ende daert naermaels bevonden worde / ten voors. leenen meer of min daer toebehoorende danne voorscreven staedt, zo protesteren wij vooghden voornomt onverlet te stane / omme de voors. heere als heere ende de voors. Jooskin als erfachtich van desen elc thebbene dies hij sculdich es thebbene metten / rechte, ter taxacien van den mannen svoorseits Jooskins huusghenooten. Ter oorconden van (1) onsen zeghelen an dese lettre van / rapoorte huutghehanghen up den XXen dach van meye int jaer duust vierhondert ende tsestich.

BRUSSEL, ALGEMEEN RIJKSARCHIEF, Arenberg Burggravie Gent Laloire 7971, akte d.d. 6 december 1500

6 december 1500

Denombrement door Kristoffel de Wilde, zoon van Jan, van een leen, zijnde 1 bunder land in Ertvelde, gehouden van het leenhof van de Burggravie van Gent in Heusden.

Dit es de grootte van den leene dwelc Kerstoffels de Wilde filius Jans, houdende es van / edelen, hoghen, moghenden, wiisen ende voorsienighen heere, mer Hughe de Molijn (1), ruddere / ende borgrave van Ghendt, gheleghen tErtvelde, groot zijnde ontrent een bundre, / lettel min oft meer ombegrepen, oostwaert met eenen becke daeran, zuutwaert es / ghelandt Jan Curse, an de noortzijde Pieter Tac, ende west een dweesstraetkin (2), oec / afghewonnen bij Pieter Tac ende meer andre diversche personen up elcke zijde daeran / ghelandt, sorterende onder sijn vierschare ende heerlichede van Huesdine (3). Ende / staet ter trauwen ende waerheden sijnen gherechten heere ende ten sulcken diensten, / camerlincghelde, wandelcoepe als doen ghelijke leenen onder den selven minen / voorseyden heere gheleghen. dWelc de voorseide Kerstoffels aldus overbrijnct Jan de Vriese / als bailiu, in voormen van denombremente, ter goeder trauwen, altijts int verbeteren ende / goetdijnckenen van den manne van den voorseiden hove, up dat sij yet meer oft min kenden / sinen voorseiden leene toebehorende, zo kendt hijt midsgaders hemlieden als medegheselle / bekennende. Certifierende al dat boven ghescreven es bij huuthanghene van / sinen eyghinen zeghele hieronder ghehanghen, ghedaen den sesten dach van / december vijftien hondert.

BRUSSEL, ALGEMEEN RIJKSARCHIEF, Arenberg Burggravie Gent Laloire 7971, akte d.d. 12 maart 1498

12 maart 1498 (N.S.)

Denombrement door Joos Damman zoon van Jan, van het goed Ten Hulle in Ertvelde, gehouden van het leenhof van de Burggravie van Gent in Heusden

Kennelic zy allen den ghenen die dese lettere van repoorte zullen zien of hooren lesen, / dat ic, Joos Damman filius Jans, houdende ben een leen van hooghen, edelen ende mueghende, mijnheere / Hughe de Meleun, ruddere, burchgrave van Ghendt, heere van Caumont, etc., dienende te zijnen / hove ende manscepe te Huesdene. Dat zelve leen ligghende in de prochie van Aertevelde, / noort van der kerken, gheheeten Ten Hille (1), welc voors. leen groot es een ghemet of daerontrent. / Ende es een mooetkin met zijnen walgrachten ende den grondt vooren int thupcommen ende achter / de moote toten vulcommene van der voors. grootte, oost an sheeren, zuut ic Joos Damman de costere / met mijnder erven daeran gheleghen, west Lijsbette Sanders filius Iacops, noort de kindren Pietre / Sanders alias Janins. Welc voors. leen ic houdende ben in manscepe van mijnen voors. heere / dienende te zijnen voors. hove. Welc voors. leen kenne staende bij versterfte ter trauwe ende / waerhede, ende ter bester vrome van drien ende XX groten van camerlijncghelde. Ende bij vertierelike / coope den tienden pennijnc, relief ende camerlijncghelt als boven. Ende dese lettre van reporte / voors. gheve ic overe, Joos Damman voors., mijnen voors. heere ende draech se hem in handen / huter name van hem, Lievin Solleberch, hoochbailliu mijns voorseits sheeren ende wettelic maendre / van allen den leenhouders van mijnen voors. heere die dienen ten voors. hove. Biddende / den zelven mijnen voors. bailliu deser waersten hiermede ontfanghelic te zijne van mijnder / voors. lettre van repoorte, wiesser min of meer zoude thoebehooren ghedaen te zijne bidde / daerof up protestacie, daerof onverlet te stane, dat te minderene ofte meerderene ter / ordinancie van den mannen van den (2) zelven voors. hove dies huusghenote ic mij kenne. In kennesse (3) / der waerheden, zo hebbe ic, Joos Damman bovenghenoomt, dese lettre van repoorte ghezeghelt / met mijnen propren zeghele hieran huuthanghende. Dit ghedaen ende overghegheven (4) de / XIJen dach van maerte int jaer duust vierhondert achtentneghentich naer tcours / van Huutrecht.

BRUSSEL, ALGEMEEN RIJKSARCHIEF, Arenberg Burggravie Gent Laloire 7971, akte d.d. 2 maart 1497

2 maart 1497 (N.S.)

Denombrement door Joos van der Zijpe, schildknaap, in naam van zijn echtgenote Barbele van Schorisse, leenhoudster, en dit van een leen van 11 à 12 gemeten land in Ertvelde, gehouden van het leenhof van de Burggravie van Gent in Heusden.

Dit naervolghende es de groodtte (1) ende overgheven van eenen leene dat edele ende weerde joncvrauwe Barbele / van Scorisse, filia mer Lodewijcx, houdende es in leene van hoghen, edelen ende moghenden heere, mer Hughe / van Meleun, ruddere, heere van Caumont, buerchgrave van Ghend, etc., van zynen hove ende herlichede van / Huesdene. tZelve leen gheleghen in de prochie van Aertvelde, groot wesende tusschen ellef ende / twalef ghemeten, lettel min oft meer, gheleghen voor Waehorult bij der dreve. Staende / dit voorseyde leen ter trauwen ende waerheden zynen gherechten heere ende teenen vullen / relieve van tien ponden parisis ende twintich scelle parisis van camerlincghelde. Ende / alst verandert bi cope, tiendepenninc van den cope, relief ende camerlinghelt ghelijc / voors. es. Welke voornomde leen ic, Joes van der Zijpe, sciltcnape, heere van Denterghem ende / als keerkelic vooght ende man van vooghdien van der zelver joncvrauwe Baerbele mijnder / gheselnede, aldus overgheve in vormen van gherechten denombremente, eerbaren ende / wiisen Lievin Ullebeerch, bailliu ende wettelic maendere in desen tijt mijns svoorseyts heeren / sbuerchgrave van Ghend, van zynder voornomden heerlichede van Huesdene, met datter toebehoort, / altijts ter correctie ende goetdincken van den mannen van den zelven hove, indien meer oft min rechts toebehoorde / dan voorseyts es, omme datte te beterene ter ordonnancie van den mannen van den voornomden hove / wiens huusghenoot ic ben, emmers als man van vooghdien. In kennessen der waerheden, zo hebbic / dit rapport ende overgheven gheseghelt met mijnen propren zeghele hieranne ghehanghen / den tweesten dach van maerte int jaer ons Heeren duust viere hondert zesse ende neghentich.