STATUTA LOSSENSIA, SIVE EDICTA, CONSTITUTIONES, DECLARATIONES & JURA COMITATUS LOSSENSIS; CUM TOPOGRAPHIA, SEU DESCRIPTIONE URBIUM, PAGORUM & LOCORUM EJUSDEM

Cum summo labore & studio recollecta a clarissimo, consultissimoque Domino LAURENTIO ROBYNS, Juris Utriusque Doctore, & Curiae Leodiensis Advocato

PARS TERTIA LEODII

Typis F. ALEXANDRI BARCHON, 1717

(p. 48 - 68)

Extract vuyt eenen Register van Costumen rustende ter Greffie van Wuestherck, gebonden in folio. Aen alle die ghene die dese onse teghewoerdighe sullen sien oft hoeren lesen, wy Scholtus ende Schepenen des gerichts der stadt ende Jurisdutie van Wuestherck, saluyt met schuldighe eerbiedinghe, ende kennisse der waerheyt.

Doen conde ende certificeren mits desen, dat voor ons personelyck gecompareert is den Heer Cornelis van de Putt Audt. Rent meester van syne Doorluchtighe hoogheyt, Domynen int graeffschap van Loon in den naem ende als last hebbende soe hy verclaerde van syn hooghwerde den heer Prelaet van S. Laurens, buyten de poorten der stadt Luyck, verseuckende van ons brieven van certificatie, oft alhier te vinden is, oft syn copie, offt copien, van die Ordonnantie ons genedichsten Heeren Georgy van oestenryck Biscop tot Luydick, Hertogh tot Bullion Grave tot Loon &c. de anno 1548 ende oft die selve Ordonnantie alhier oock wordt geobserveert.

Aen alwelck redelyck versoek condescenderende attesteren, ende certificeren, mits desen, dat wy geopent hebbende onse Archiven, waer in besloeten ende bewaert worden die oude Registers ende stucken dese stadt ende Justitie concernerende, hebbende naer een neerstich ondersoeck in de selve bevonden onder anderen eenen Register, gebonden in folio inhoudende de genaghten soo buyten als binnen dese stadt beginnende XXI. Dach January anno 1548 eyndende den derden dach van mert anno vuyfftich, in welcken Register onder andere bevonden wordt geregistreert te syn in authentycke forme met goede leesbaere caractere, ende onderteeckeninge, die boven gementioneerde Ordonnantie luydende van worde tot worde soe hier naer is volgende

INHAUT DER ORDINANTIEN

Anno 1548. 14 Marty in den Sale gepubliceert, ende gepubliceert den 15. Aprilis in de Stadt Herck

Ordinantie ons Genaedichsten Heere Georgius van Oostenryck, Bisscop tot Luydick, Hertogh tot Buillion, Grave tot Loon &c. by advys van der manschap des Graeffschap van Loon in den Sale van Curinghen geordineert ende gemaeckt om voirtaen int Graeffschap voorgenompt als recht gehalden te worden totter teyt toe anders geordineert wordt.

Van sweren ende vlocken

In den eersten is geordineert,soe wye dat sweert ons lieffs heeren vyff wonden macht, cracht, oft dergelycke sal voor die eerste reyse verbeuren negen stuyvers voor die tweede reyse dobbel voor die derde reyse op 27 stuyvers ende soe voertaen t' appliceren in drien, een deel der kercken daers sullixs gebuert dat ander deel den Heer, ende het derde deel den aenbrenger, ende offt hys niet betaelen en konde soe sal men hem voor die eerste ryse setten eenen wech tot Aecken, die tweede reyse tot Colen, ende die deerde reyse tot Trier all met die voeten te gaen, ende bescheyt te brengen, ende doent de kinders in hunne alders broet synde, soo sullen die alders betaelen, soe verre sy die kinderen niet hertelyck en straffen, soe balde tot hunne kennisse comen is, ende van meerder blasphemie sal men corrigeren naer gelegenthy der saecken ende naer erkentenisse des gerichte daert onder geschiet.

II

Wy men stock goet ende sytval ontfanghen sal

Noch is geordineert dat men die ceyns goederen dat stock goet is sal een gebuesom te mael moegen ontfangen, haere sy veel oft weenich, met dobbel ceyns, dobbel ban, ende dobbel recht, dan die sytvallige goederen comende van broeders, susters, oem, muye,neve, nichte, oft dergelycke sal een yder syn deel ontfanghen besonder, ende betaelen opcomelinghen, ende ennen ban ende een recht simpel.

III

Wie men ceyns goederen pachten ende renten staende op ceyns goederen ontfanghen sal

Noch is geordineert dat men die pachte ende rente staende op die ceyns goederen sal reliveren, ende betalen van den gulden iaerlyx eenen stuyver, ende voert vaet van den greynen een oort voor den Officier, ende eenen ban, ende een recht van yder persoen.

IV

Als men goet vercoept wy die hoff rechten schuldich is

Noch is geordineert als yemant syn goet vercoept soo sal den coeper, t' pont gelt, rechten , opcomelingen, ende allen lasten betaelen, ende den vercooper en sal niet geven.

V

als men pacht oft rente verkoept staende op ceyns goet wie sulcx sal moegen beschudden

Ende aengaende ceyns goet belast wesende met pacht oft rente, ende die selve pacht oft rente vercocht wierde sal den proprietaris van den gronde moegen vernaederen, de vrinden ende maeghen hun recht van vernaederinghen voorbehalden ende gereserveert.

VI

Hoe men die leen goederen belasten mach

Noch is geordineert, dat men die leenen voortaen, niet meer belasten en sal dan met quyt rente, den penninck twintich oft daer onder.

VII

Wy men gesplet ende belasde leenen die vercoght worden sal mogen bescudden

Noch is geordineert datt men voortaen alle gespleten ende belasde heer geweer leenen, die by helder der selver leenen worden vercocht, sal den proprietaris, oft helder van den aenseel oft principael leenen binnen iaers moeghen Lossen voor sullighe penningen daer sy voor gecocht syn, behaudelyck de vrinden hun recht van vernaederinghe.

VIII

Als men by vercoop oft deylinge syn goets over die helfft bedrogen is wy men weder daer toe coemen mach

Ende oft ymant by vercoop oft deylinghe syns goets over die hellifft bedroeghen wordt hy ende syn erffgenamen sullen alteyt dat moegen Lossen, met sullighe penningen daer voor ontborst met behoorlycke reparatie nae recht, by alsoe dat men bewyst nae recht dat in den vercoop het selve goet die hellifft beeter was.

IX

Voor wat banck dat men die gichten doen sal

Noch is geordineert dat alle gichten sullen geschieden ende gedaen moeten worden voor die banck daer die goederen onder sorteren, ende niet alders, op die pene by ons arbitralyck gecorrigeert te worden het en waere dan dat die banck vaceerde, alsdan sal die gichte voor t' hoeft geschieden ende gedaen moegen worden, behalffen de nederbancken, ende den erffgenaemen hun recht.

X

Van quaede gichten

Ende waert saecke dat in overdracht van der gichten ymant met quaeder offt valsche gichten gegicht worde, sal den transporteur by ons in exempel van anderen arbitralyck gecorrigeert worden, ende daer toe sullen syn goederen verobligeert syn, om die gichte met allen interess goet te maecken ende op te rechten.

XI

Van genachten te halden ter Loenscher aerden

Sullen oock die Loonsche Schepenen ter Loonscher aerden hun genachten halden, ende alle persoonen buyten die stede woenende, sullen in actie personeel voor die selve Schepenen te recht staen, als sy daer aengesprocken worden, ende dit sonder prejudicie van den kennisse van onsen Officiael, als sy hem gebuert.

XII

Van die Luyxsche ende Loonsche goederen in diversse registers te schryven

Noch is geordineert dat allen rent meesters in den lande van Loon sullen niewe ceyns Registers maecken, ende ondersoecken die alde ceyns Registeren in presentie der gerichten ende stellen die Luyxsche ceyns goederen in eenen Register, oock allen desgelycken die Loonsche goederen offt ceyns, op dat de goederen niet gedenatureert noch nymandt onterfft en worden want die Luyxsche goederen volgen den lancxsten levende (daer gheen geboert en is) ende die Loonsche volgen die naeste erffgenaemen want geen testament, hauwelyxe voorwaerde, offt ander contract en breeckt, desgelycken sullen die gerichten oock verscheyde registeren maecken, ende alle gichten ontfanghen, ende hun proceduren stellen besonder, op de pene ende Ordonantie onss genaedichste Heere.

XIII

Van conden

Noch is geordineert dat men de conde in die banck offt laethooff niet meer en sal wysen, dan sullen nae versoecken van partyen by den geswoeren bode gedaen worden den welcken hebben sal van eeder conde in reel saecken eenen halffen stuyver, ende in personeel saecken een oert, moet hy buyten gaen, soe sal hy hebben van die myle twee stuyvers, ende in den laethoff sal den meyr die doen, ende daer van hebben oick twee stuyvers, ende ingevalle hy buyten moet gaen sal hy hebben van die myle dry stuyvers, ende alst der hoocheyt aengaet sal die conde geschieden met meyr ende twee laeten, sal hebben den meyr vier stuyvers ende yders laet twee stuyvers.

XIV

Van constitutien van Procureurs

Noch is geordineert dat een yder edelman gebruyckende wapen sal moegen met synen brieff ziegel, ende hantteecken constitueren, offt voor t' gericht der plaetsen daer hy woenachtich is, oft voor Notaris ende getuygen, vyttgenomen allen saecken die inder Saelen geintenteert sullen worden, inder welcker (aengesien den Prinsche selver in persoen tegenwordich sidt) soe sal een yegelyck wy daer constitueren wilt, dat aldaer in persoon doen, offt voor stadt helder ende Leen mannen naer alder gewoenten, ende alle andere constitutien sullen geschieden voer die gerichten daer die partyen woenen, oft daer die questie valt, ende van die constitutie sal het gericht hebben een recht, ende inden gevalle die partye eenighe certificatie begeert, salden Scholtet metten gericht eenen carolus gulden hebben.

XV

Die voor spreckers moeten geswoeren synn

Item, is geordineert dat niemandt voorsprecken en sal, oft hy en is voor alt gheeydt ter plaetsen daer hy voirsprecken wilt.

Den eedt van die voor spreckers

§ 1. Noch is geordineert dat alle voorspreckers hoichelyck sullen sweeren, dat sy int aennemen van der saecken hun nerstelyck sullen laeten informeren, ende goede informatie nemen van den recht offt ontrecht hunder parthyen, ende in den gevalle sy bevinden eenighe partye quaede saeke te hebben dat sy die niet aennemen en sullen oft ten minsten die parthyen adverteren, dat sy niet en doech, ende ingevalle die partye daer boven dinghen wille, dat sy dan egheen on weghe het recht stellen offt behinderen en sullen, ende dat sy een yder sullen dienen diet versoeckt, des sal men hun taxeren voor yder judiciel acte daer hy dient onderhalfven stuyver, ende in der salen dobbel recht, ende als sy buyten worden gehaelt, naer gelegentheyt der saecken ter discretie van den recht dan een yegelyck mach syn selffs wordt doen by hem oft synen mombaer.

XVI

Van claechten te doen

Noch is geordineert dat die eerste claechte sal moeghen geschieden met eenen gemeechtichden momber, daer van het gericht sal hebben een recht, desgelycken van der tweeder ende derder claecht.

§ 1 Ende ter tweeder claecht offt genachten sal die boet vallen te weeten eenen twyntich stuyvers.

XVII

Rechten van vytcoemen van die gerichten

Noch is geordineert als eenich neergericht vergaert is, soe sullen sy om hunne behuerlycke rechten allen partyen diet versuecken recht doen ende die partyen die hunder gebruycken sullen het vyt comen gelyck betalen, ende voor die vergaderinghe sal t' gericht hebben eenen gulden, te weten het gericht 14 stuyvers, den Scholtis vier stuyvers, den Secretaris eenen, ende der bode eenen stuyver, aengaende reeninge ende steininge sal het gericht hebben met den Scholtis dobbel recht te verdeylen als boven voor hun vuyt comen.

XVIII

Van genachten te halden

Item, is geordineert dan alle Scholteten, meyeren van leen ende laethoeven, sullen schuldich syn hon genachten te beginnen te winter teyt te thien vuren, ende te somer teyt te beginnen te negen vuren, ende die selve genachten continueren, ende te voleynden sonder vertreck.

XIX

Wanneer partyen schuldich syn te antworden in actie personeel

Noch is geordineert dat men in allen saecken personeel sal antworden ter tweeder genachten, offt men sal den verwerder wysen verreyckt op syn noot, ende en probeert hy syn noot met ter naesten genachten daer naer, nae erkentenisse des gerichts, soe sal hy alsdan t' gewysde voldoen eer hy tot eenighen verantworden comen sal van den vonnisse, daer van het gerichte sal hebben een recht.

XX

Wanneer men vonnis geven sal in der erffelychheyt offt reel

Noch is geordineert dat het gericht tot versueck van partyen sal geleyt geven, daer van den Scholtez sal hebben vier stuyvers die Schepenen tsaemen XIV stuyvers, den Secretaris eenen stuyver, ende der bode eenen stuyver, ende daer nae sal men drymael affruyminghe wysen op 7 scillingen, ende ist noit allemael daer voer panden, ende dan het groet gebot doen, ende van den groeten gebodt te doen met den Scholtes ende vier Schepenen sullen sy hebben eenen gulden, den Secretaris mede ingereekent.

XXII

Van vutsal te geven die schult te betaelen binnen ses wecken offt twee maenden

Noch is geordineert dat die gerichten den armen luyden niet macht hebbende hon schult te betaelen sullen moegen vytsadt geven naer gelegentheyt van der saecken ende persoenen, behalfven dat hy die schult ter naesten genachten bekent ende geloefft die te betaelen binnen gesadden teyt ende offt hy des niet en doet, soe sal men executie doen, offt hy met allen recht verwonnen waere, all ter discretien des gerichts sonder eenighe dissimulatie, by alsoe dat sulcke dilatie niet en excedeert den teyt van sess weeken offt ten hoochsten twee maenden.

XXIII

Wat de gerichten hebben sullen voor die exhibitie der vermeten van ellycken getuyghen te hooren van interrogatorien ende calengeringe

Noch is geordineert dat die gerichten sullen hebben voor die exhibitie van den vermeet een recht, ende van yeder getuyghe die sy hoeren der articulen syn veel offt wenich eenen recht, desgelycken sullen sy hebben van den interrogatorien ende getuyghen, dan van den getuyghen in iedt te stellen sal den Scholtet niet hebben, ende dat alle gerichten ten verseuck van partyen son calengeringe sullen opteecken, ende daer van hebben een recht.

XXIV

Wie die proeff haeren ganck hebben sal

Noch is geordineert als een partye ontkindt ende die ander sich ter proeven dringht, sullen sy mallick geven een recht ende gebuesom offt gemeynt sullen geven een dobbel recht, ende ieder parthie sullen vier proeffdach hebben sonder eenige diligentie derven te thoenen oft ander proeffdach te versuecken, ende offt hy binnen syn prooffdaeghen eenige getuygen deur crancheyt offt vytlendicheyt offt andere wettige noitsacken niet crygen en conde, soe sal hy die goets tyts voor t' vonnisse moegen leyden, ende syn weder partye den naem opt vermet geven om syn calengeringhe daer op te doen, ende wat getuygen die niet konnen tuygen, als sy tweemael met den bode daer syn onder geseet en syn naer recht versoecht sullen syn, sullen verbeuren een boet van 7 scillingen aen den heer daer sy onder woenen, sy en hedden alsdan wettige ontscholt.

XXV

Wie men interrogatorien mach exhiberen ende daer op getuygen horen

Noch is geordineert dat men in allen saeken mach interrogatorien geven om reden te seggen van honre wetenheyt, ende niet voorder, die men den getuygen ieerst lesen sal, daer nae het vermeet om die saeck te beeter tot honne memorie te brengen, ende yder partye en sal men eenen vermeet overgeven, ende een allegatie ende men sal gheen proeff op proeff admitteren.

XXVI

Wat het gericht hebben sal als men Schepen Register in staet van proeve stelt

Noch is geordineert dat men van brief ziegel, testament hauwelyxe voorwaerde, schepen Register, ende andere registeren die men in staet van proeve stelt geven sal twee rechten.

XXVII

Dat men erff brieven van werden halden sal ende wat Stadthelder ende leen mannen voor hunnen segel hebben sullen

Noch is geordineert dat men alle erffbrieff van werden halden sal, die welcke by Stadthelder ende vier leenluyden beziegelt syn sonder dat van noede syn sal meer ziegelen daer aen te hangen, waer van der Stadthelder hebben sal voor syn ziegel eenen gulden bb. ende ellick leen mannen ses stuyvers ende in cleyn hoeven sullen sy halff soe veel hebben.

XXVIII

Van certificatie brieven int leen

Noch is geordineert dat certificatie brieven ende cleyn acten beziegelt als boven sullen van werden gehalden worden, ende die sullen der partyen verleent werden, mits betalende elcken Leenman drye stuyvers ende den Stadthelder sess, ende den Secretaris sess.

XXIX

Van sententie interlocutorie niet t' appelleren

Noch is geordineert dat men van sententie interlocutorie niet appelleren en sal, en sal oick het hooff gericht sullige appellatie niet aennemen, soe verre die niet merckelycke redenen en hebben, daer deer men behoerde het principael aft te wysen ende sullige appellatie niet teghenstaende, sal men int principael procederen, ende die vonnissen ter executie stellen.

XXX

Dat alle gerichten binnen ses weecken nae die conclusie van het proces t' vonnisse geven sullen

Noch is geordineert dat al gerichten, als het proces gesloeten is, gehalden sullen syn tot versueck der parthyen binnen ses wecken vonnis te geven, met den meesten gevolge, daer van sy sullen hebben twee rechten, ende en wordet niet geappelleert (die costen voor all betaelt) soe sal men die sententie terstont ter executien stellen op die poene te verbeuren als boven gescreven ende te appliceren geleyck voorseyt is.

XXXI

Als partyen niet moeghen appelleren

Item, is noch geordineert, dat men van ghenen vonnisse ter banck daert geschiet gewesen, op eenige gelooffte offt bekentenisse voor recht gedaen, en sal moegen appelleren op die poene van eenen wech te Rutsemedouwe, halff den heer, ende die ander helleft der clagender partyen, ende niet te min het vonnisse ter executien gestelt te worden, eenige appellatie offt oppositien niet tegenstaende.

XXXII

Den daet te schryven

Noch is geordineert dat men op die processen die inder saelen geappelleert werden, sal schryven den datum als sy aenbrocht werden, ende die alste sal men yeerst wysen ende vytsprecken.

XXXIII

Wie men processen aenbrengen sal ende wie veel sy daer van hebben sullen

Ende alle appellatien van cleynen leenhoeven, bencken, eygensche hoeven ende laethoeven sullen respective met den Stadthelder, Scholtet, offt Meyr, met twee Leenmans, twee Schepenen, twee laeten met honnen Secretaris, aenbracht werden, waer van sal der Stadthelder, Scholtet offt Meyer des daechs hebben vierentwintich stuyvers, die leenmannen, Schepenen offt laet ende secretaris vandyen elcke hebben des daechs twelff stuyvers, ten waere die selve vytt eenighe merckelycke oirsaicke te perde quaeme, offt comen moest, die welcke als dan daechs hebben sullen eenen gulden bb. der processen syn veel offt weenich, ende dat hoefft gericht sal hebben voor die leeringe tweentwintich stuyvers.

XXXIV

Wie cort men die acten oft Proces oytgeven moet daer naer dat geapelleert sal syn

Noch is geordineert voortaen als die partyen appelleren, soe sal men tot honnen versoeck aensprack, ende antwordt geven binnen eynder maendt, onderteckent by den Secretaris, ende van den appellatie ende die acten te groesseren ende te collationneren sal het gericht hebben twelff stuyvers, ende Scholtet syn appellatie boet, te weten seven scillingen, ende den Secretaris sess stuyvers, behalfven nochtans die fulminatie des process.

XXXV

Dat men der winnender partye haer gelt sal weder geven alst gewesen is

Ende als de appellatie by sententie gewesen offt weder gekant is, soe sal men der winnender partyen haer pandt oft geld ter caussen van der appellatien genantiseert synde, sonder vertreck tot haeren versueck binnen acht daeghen restitueren op die poene van eenen wech S. Jacobs, halft den heer, halft der clagender partyen met die panden ende settingen.

XXXVI

Als Schepenen iet afgeleert wordt den lant recht aengaende

Noch is georineert als men eynich gericht yet affleert dat contrarie is den lantrecht, dat sy des niet meer en sullen useren, op poene van eenen wech S. Jacobs te verbeuren aen den Heer daer sy onder geseten syn.

XXXVII

Van cleyne saecken niet t' appelleren

Noch is georineert dat men van cleyne saecken niet boven gaende vyfftich brabant gulden eens in der saelen niet appelleren en sal, sy en tangeerde dan die erfftaele, syn hoicheyt ende jurisdictie, het en waere dan dat den appellant yeerst het gewysde voldeede, ende die costen betaelden, op cautie dat gedaen synde, sal men die appellatie admitteren, anders sal men het vonnisse ter executien stellen.

XXXVIII

Vonnissen in der salen gewesen en sal men voor die neerbanck niet vutdragen

En nu voortaen en sal men die vonnissen in den salen geweesen niet neer voor die neer gerichten vyttdraeghen, dan als die partyen hon costen overgegeven, sal het gericht hebben een recht, ende van den taxaet der costen sullen sy hebben een dubbel recht.

XXXIX

Van dieten oft vacatien

Item, men sal der winnender partyen drye dieten toe taxeren ende niet hoogher, ende en sal niemants van wat staet hy sy, hoogher voor syn comparitie getaxeert worden, dan vier peerden, ende daer onder nae qualiteyt der persoonen.

XL

Vie veel t' gericht hebben sal van testament hauwelyck voorwart

Item, is oock geordineert dat t' gericht hebben sal van eene testament offt hauwelyxe voorwaerde te approberen eenen gulden brabans, ende der Scholtet twelff stuyvers, ende der Secretaris met den boede sullen begrepen syn in den gulden voors.

XLI

Van te ziegelen

Item, men sal in de neerbanck offt laethoven die beziegelinge van brieven ende certificatien in gelycker maeten ziegelen, ende die rechten nemen als voors. is, dan die gerichten die gewoen syn met eenen gemeynen ziegel te ziegelen, sullen noch alsoe doen, dan sy en sullen niet ziegelen, sy en syn vier sterck ten minsten ende die ziegel sal in goede bewaernisse gesloeten worden met drye sloeten, dan in cleyn acten, sullen die hoeffbanck ziegelen naer alder gewoente, te weeten daer van te hebben vierthien stuyvers.

XLII

Wat men den Secretaris schuldich is

Item men sal den Secretaris geven van eenre gichten te suecken sy is alt oofft jonck twee rechten, ende van eenen heyssch te maecken een recht van een vermeet te maecken, sy cleyn offt groet een dobbel recht, ende van den process te maecken van den blade pappiers eenen stuver ende van den fransyne brief offt certificatie naer groetheyt der selver nae ordinantie van den gerichte.

XLIII

Van boeten van leen rechten van Scepenen rechten

Item, voor den real sal men betaelen 30 st., voor een boet van 7 scillingen 21 st. voor eenen leen recht sess stuyvers, te weeten den Stadthelder twee stuvers, die Leen luyden twee stuvers, ende die Secretaris twee stuvers, voor een recht van andere gerichten onder halfve stuver, ende voirts alle bruycken, opcomelinghe, ende vervallen in sullighe munten als der lants furst in synen genaden ceyns iaerlyx op hefft, ende voor die boet, opcomelinghe, ende rechten sal men moeghen penden.

XLIV

Van inquesten aen te brengen

Item, sal men voertaen alle inquesten moeghen aenbrengen met twee Schepenen ende honnen Secretaris beziegelt ende besloeten, oock onderteeckent by den selven Secretaris ten minsten cost ende schaede.

XLV

Als eenen mesdadige eenen anderen bedracht

Item, eenich mesdediger die ter Justitie bracht is, ende ander bedraecht in syn testament, ende daer op sterfft, sal men den selven bedragen synde moegen aentasten, sonder inquesten, om den selven te recht te stellen.

XLVI

Die peyne tegen die geene die sich mysgrepen offt deden tegen dese Ordinantie voors.

Ten lesten is geordineert dat ingevalle ymant van wat staet oft conditie hy waere sich misgreep offt dede thegen die ordinantie, puncten, ende articulen voors. daer gheen speciael peine gestatueert en is, nae publicatie det selver sal ter iersten reysen verbueren eenen wech tot Rutsemedouwe, ter tweder reyse sint Jacobs ende ter derder tot Cypers, t' appliceren den Heer daer t' onder gebuert.

Concordat by originael ende on derteeckent Vaerlaer.

Ende was op den Register onderteeckent POUWELS VANDER MOELEN, Secretaris der stadt Herck.

Voorders attesteren ende certificeren wy Scholtis ende Schepenen dat diversche copyen der voors. ordinantien onder onse confrers, ende meer andere Practiseynders van het Graeffschap Loon te vinden syn, ende dat de selve ordinantien binnen dese stadt ende jurisdictie als loonschen landt recht ende statut altyts syn geobserveert geweest, ende worden by ons tegen wordich noch geobserveert, in oirconde der waerheyt ende kennisse der saecken boven gescreven hebben wy Scholtus ende Schepenen dese opene briefven deur onsen gerichts Secretaris daer over doen scryven die boven gemelde ordinantien daer inne doen insereren, ende by ons consistorialiter gecollationeert synde, onderteeckenen ende met onsen gemeynen Schepen Ampschen zegele bevestighen int iaer ons Heeren 1688 in die maent Octobris de vierden dach. De mandato Dominorum. Was geteeckent ende gesegelt als volcht, S. COLEN, Secretarius per Registrum subscripsit L.S. collat.